​ក្រោយពី​បាន​បំបាក់​ក្រុម Manchester City យ៉ាង​ចាស់ដៃ​ក្នុង​លទ្ធផល ៤-១ ក្នុង​ក្របខ័ណ្ឌ Premier League កាលពី​ចុង​សប្តាហ៍​មុន ក្រុម Spurs នឹង​ស្ថិតក្នុង​ការជឿជាក់​យ៉ាង​ល្អ​សម្រាប់​ការធ្វើដំណើរ​ទៅកាន់ ប្រទេស​បារាំង​ដើម្បី​ជួប​ក្រុម Monaco ក្នុងការ​ប្រកួត​ពូ​ល J របស់​ពួកគេ​។

​ក្រោយពី​បាន​ផ្តួល​ក្រុម Qarabag ៣-១ ក្នុងការ​ប្រកួត​បើកឆាក​នៃ​ក្របខ័ណ្ឌ Europa League របស់​ពួកគេ លោកគ្រូ​បង្វឹក​សញ្ជាតិ​អា​ហ្ស​ង់​ទីន Mauricio Pochettino របស់ Spurs ក៏​នឹងមាន​ភាព​ធូរស្រាល​ក្នុងការ​ឃើញ​តារា​ឆ្នើម​២​នាក់​របស់​ពួកគេ រកឃើញ​ទម្រង់​លេង​យ៉ាង​ល្អ​របស់​ពួកគេ​ត្រឡប់មកវិញ​ផងដែរ​។​

​ការធូរស្រាល​នោះ​កើតឡើង នៅពេលដែល​កីឡាករ​មានតម្លៃ​ខ្លួន​ដ៏​ខ្ពស់ Eric Lamela បានធ្វើការ​គ្រប់គ្រង​ទាំងស្រុង​ក្នុង​តំបន់​បម្រើ​របស់​ក្រុម Man City ខណៈដែល​ខ្សែប្រយុទ្ធ​អន្តរជាតិ​អង់គ្លេស Harry Kane បានបញ្ចប់​ការមិនអាច​រក​គ្រាប់​បាល់​ស៊ុត​បញ្ចូល​ទី​របស់គេ​។

​ដោយឡែក ក្រុម Monaco ដែល​បាន​ចាញ់​ក្រុម Valencia ក្នុងការ​ប្រកួត​វគ្គ Play-off នៅ​ឆ្នាំនេះ បាន​ឈានទៅ​ប្រកួត​ក្របខ័ណ្ឌ Champions League វគ្គ​ពាក់កណ្តាល​ផ្តាច់ព្រ័ត្រ​កាលពី​រដូវ​កាល​មុន ក្រោយពី​មាន​តំបន់​ការពារ​យ៉ាងរឹងមាំ​។

​ក្រុម​របស់​បារាំង​មួយ​នេះ បានបញ្ចប់​ត្រឹម​លទ្ធផល​ស្មើ​ប៉ុណ្ណោះ​ជាមួយនឹង​ក្រុម Anderlecht ក្នុងការ​ប្រកួត​បើកឆាក​របស់​ពួកគេ ប៉ុន្តែ ក្រុម​របស់លោក Leonardo Jardim បានអនុញ្ញាត​ឲ្យ​មាន​គ្រាប់​បាល់​ចូល​ទី​របស់ខ្លួន​៨​គ្រាប់​ក្នុងការ ប្រកួត​លី​ក​៣​លើកចុងក្រោយ​របស់​ពួកគេ ក្រោយពី​លក់​ចេញ​ខ្សែការពារ​ដ៏​ឆ្នើម​២​នាក់​រួមមាន Layvin Kurzawa និង Aymen Abdenoour​។ ការប្រកួត​នៅ​រាត្រី​នេះ នឹង​ចាប់ផ្តើម​នៅ​ម៉ោង​១២​អធ្រាត្រ​៕

​ការជួបគ្នា​១​លើក​របស់​ពួកគេ​
03.08.13          Monaco 5-2 Tottenham

​ប្រភព​៖ cambosport
​